 Hər insan öləcəyi vaxtı öyrənə biləcək!
Payızdan
etibarən hər insan yaşayacağı illərin sayını və öləcəyi vaxtı öyrənə
biləcək. İspaniyanın "Life Lenght" şirkətində hazırlanmış test insan
xromosomlarının ucundakı DNT turşusunun uzunluğunu ölçərək insanın
bioloji ömrünü müəyyənləşdirəcək. "Telomer" adlanan bu sahələr DNT-ni
zədələrdən qoruyur. Zaman keçdikcə telomerlər qısalır və nəticədə
hüceyrənin bölünməsi dayanır, bu da qocalma prosesini sürətləndirir.
Ona görə də alimlərin fikrincə, telomerləri qısa olan insanlar daha az yaşayırlar.
"Test
vasitəsilə çox qısa telomerləri müəyyənləşdirə bilərik. Lakin uzun
telomerlərin insan həyatını nə qədər uzatdıqlarını dəqiq bilmirik. Buna
rəğmən, test sadə, sürətli və dəqiqdir", - Madriddəki İspaniya Xərçəng
Tədqiqatları üzrə Milli Mərkəzinin əməkdaşı, testin müəllifi Mariya
Blasko deyir.
Test vasitəsilə insanın ölüm gününü
müəyyənləşdirmək hələlik mümkün olmasa da, alimlər testin yaxın
vaxtlarda çox populyarlaşacağına şübhə etmirlər. Bundan başqa, test
xərçəng, ürək-damar xəstəlikləri və Alsgeymer xəstəliyi ilə mübarizədə
effektiv vasitələrdən birinə çevriləcək.
Bəzi ekspertlər isə
hesab edirlər ki, yeni kəşf Pandora qutusunun açılması deməkdir.
Həyatlarının sonuna az qaldığını öyrənəcək insanların reaksiyalarını
təxminləmək mümkün deyil. Bundan başqa, sığorta şirkətlərinin müştəri
ilə müqavilə imzalamazdan əvvəl onu testdən keçirəcəyi də şübhə
doğurmur.
| 
Cümə, 26.04.2024, 09:55
